Ruta Botánica

Esta guía percorre a ruta botánica, ó longo de dous quilómetros polo Campus de Lugo. Con ela na man, o noso Campus mostra un aspecto absolutamente diferente. O paseo convértese nun exercicio didáctico, nunha aventura de descubrimentos botánicos para o profano, para o estudoso e mesmo para quen a botánica non garda segredos.
O Campus de Lugo ofrece a súa riqueza de especies europeas, americanas, africanas ou de Oceanía, entre as que podemos atopar algunhas híbridas, produto das prácticas de xardinería. Levan tempo aí, agardando a mirada e a clasificación por parte dos expertos e agora, grazas ó esforzo da USC, esas singularidades adquiren protagonismo e, polo tanto, un novo valor. O valor da diferenciación grazas ó coñecemento.
Nesta publicación proponse unha ruta, a máis accesible, pero ó pasear polas máis de 34 hectáreas e media que ocupa o noso Campus decatarémonos de que non é o único recuncho verde por descubrir da provincia. Con máis do 50 % do seu territorio declarado Reserva da Biosfera pola Unesco, en Lugo poderemos imaxinar e inventar novas rutas cada día.